Станьте участником команды «Рублева»

cross
Поздравляем Святейшего Патриарха Кирилла с 70-летием!
Главная / Молитвы / Молитвослов / О здоровье и исцелении телесных недугов / Молитвы в случае немоты и нарушений речи

Молитвы в случае немоты и нарушений речи

молитва

Молитвы преподобному Иоанну Рыльскому

Тропарь, глас 1:

Покаяния основание, прописание умиления, образ утешения, духовнаго совершения равноангельное житие твое бысть, преподобне. В молитвах убо и в пощениих и в слезах пребывавый, отче Иоанне, моли Христа Бога о душах наших.

Другой тропарь, глас 4:

Тело смирив пощением, душу же возвысив пением, сосуд явися избран Святому Духу, Иоанне, отче наш, в чистоте сердца твоего, преподобне, пожив. Тем, дерзновение имея ко Господу, моли спастися душам нашим.

Кондак, глас 2:

В молитвах бодренно не усыпая и в пениих непрестанных Ангелом подобяся, в гроб вшел еси, тленную жизнь оставив, и к Небеси прешел еси на нетление, Иоанне отче, от смерти бо к животу вечному тя пресели Христос Бог, яко Своего угодника.

Другой кондак, глас 6:

Благодатию Божиею нас обогатил еси и делы благими известил еси, званием явися, Иоанне, угодник Христа Бога. В молитвах и постех дарований Божия Духа исполнися и бысть недугом прогонитель и заступник душам нашим.

Еще один кондак, глас 2:

Молящим тя теплейший заступниче и просящим скорейший послушателю, преподобне отче Иоанне, приими моление наше и Христа умоли помиловати нас, Единаго Преблагаго и Многомилостиваго.

Молитва:

О, великий и предивный чудотворче, преподобне Иоанне, приими моление наше и не отвратися от нас, к твоему заступлению прибегающих: никогдаже бо отвращался еси от приходивших к тебе с печальми своими во дни земнаго твоего жития; вемы же, коликая знамения милосердия являл еси и по преставлении твоем людем православным! Услыши и нас ныне, велиими скорбьми обдержимых, нашедшими на ны в лукавыя дни сия, егда диавол чрез пагубныя козни своя тщится попрати Церковь Святую, лишити же нас спасения вечнаго и благ временныя жизни! Испроси нам у Господа Иисуса Христа прощения грехов, а наипаче греха непослушания Матери нашей Церкви! Даруй нам сокрушение сердца, во еже со умилением неуклонно приступати ко святому Таинству Покаяния, яко да не во осуждение и погибель будет нам причащение Тела и Крове Христовых, но во здравие и спасение. Отжени от нас дух братоненавидения, даруй нам дух любве и мира к братскому единению всех людей твоих! Соеди всех нас любовию ко Христу и Его Церкве Православней, яко да соблюдающе спасительную волю Его, истинная чада Божия будем! Буди нам путевождь во вся дни наша, яко да присно в благодати Духа Святаго суще в чистоте веру содержим и волю Господню до самыя смерти сотворим! В час же кончины нашея явися нам представити души наша к престолу Божественнаго Судии и рещи Ему: “Се аз и дети моя”, яко да твоим заступлением вечных мук избавльшеся, неизреченное блаженство Небеснаго Царствия Христова наследим купно с тобою и всеми святыми во веки веков. Аминь.

Молитва перед иконой Божией Матери Колочская

О, Пресвятая Владычице Богородице, Царице Небесе и земли, Высшая Ангел и Архангел и всея твари Честнейшая, Чистая Дево Марие, миру Благая Помощнице, всех христиан Утверждение и всем во всяких нуждах Избавление!

Призри ныне на рабы Твоя, молящияся Тебе умиленною душею и сокрушенным сердцем, со слезами припадающия и пречестному и цельбоносному образу Твоему поклоняющияся. Буди за нас Ходатаица к Сыну Твоему, Христу Богу нашему, мы бо, грешнии, не имамы иныя Помощницы, разве Тебе, Владычице. Ты еси наша Надежда и Упование, Ты еси Заступница и Предстательница наша, Ты обидимым Защищение, печальным Утешение, скорбящим Радование, сирым Прибежище, вдовицам Хранительница, девам Слава, слезящим Веселие, больным Исцеление, грешным Спасение.

Сего ради, о Богомати, к Тебе прибегаем и, на Твой святый образ взирающе, с любовию покланяемся Тебе и молебное пение приносим, вопиюще: помилуй ны, Мати Божия, и прошения наша исполни во благо, вся бо возможна суть ходатайству Твоему к Сыну Твоему, Христу Богу нашему. Емуже подобает всякая слава, честь и поклонение со Безначальным Его Отцем и Пресвятым и Благим и Животворящим Его Духом ныне и присно и во веки веков. Аминь.

3
Суб
2016