Станьте участником команды «Рублева»

Икона Божией Матери «Взыскание погибших»

    Время создания (от - до):
    Дни празднования:
    Иконографический тип:
    Размер:
    Чудотворная:
    Клеймо:
    Праздники:
    акафист

    Этот акафист читается также перед иконой «Всех скорбящих радость»

    Кондак 1

    Взбранней Воеводе победительная, яко избавльшеся от вечныя смерти благодатию от Тебе рождшагося Христа Бога нашего и Твоим Матерним пред Ним ходатайством, благодарственная восписуем Ти, раби Твои: яко имущая державу непобедимую, от всяких нас бед и скорбных обстояний свободи, зовущих:
    Радуйся, Благодатная Богородице Дево, Погибших Взыскание и Всех Скорбящих Радосте.

    Икос 1

    Ангел предстатель послан бысть с небесе рещи Богородице:
    Радуйся, Благословенная в женах, предреченная Мати Христа, Сына Божия. Темже и мы, грехми обремененнии, надежду спасения в Тебе улучивше, умильно взываем Ти:
    Радуйся, Божие ко грешным благоволение;
    Радуйся, кающихся пред Господем Богом крепкое заступление.
    Радуйся, падшаго Адама воззвание;
    Радуйся, слез Евиных избавление.
    Радуйся, греховную отъемлющая скверну;
    Радуйся, бане, омывающая совесть.
    Радуйся, рождшая Избавителя, беззакония наша милостиво очищающаго;
    Радуйся, всечудное всех к Богу примирение.
    Радуйся, мосте, воистину преводяй нас от смерти к животу;
    Радуйся, мир от потопа греховнаго спасшая.
    Радуйся, лествице небесная, еюже Господь к нам сниде;
    Радуйся, вина всех обожения.
    Радуйся, Благодатная Богородице Дево, Погибших Взыскание и Всех Скорбящих Радосте.

    Кондак 2

    Видяще токи чудес, изливаемыя от святыя Твоея иконы, Благая Богородительнице, и разумеюще, яко Ты еси молящихся благая помощница, обидимых заступница, ненадеющихся надежда, печальных утешение, погибших взыскание, алчущих кормительница, нагих одеяние, девственных целомудрие, странных наставница, труждающихся помощь, слепых прозрение, глухих благослышание, больных исцеление, благодарственне вопием о Тебе Богу: Аллилуиа.

    Икос 2

    Тайну Твоего, Богородице, заступления людей, в скорби погибающих, уразумети хотяще, к Тебе прибегаем, о Мати и Дево. Ты же, яко Благая, научи ны разумети в защищении Благаго Сына Твоего милосердое промышление во спасении душ наших и очищение многих согрешений, да взываем Ти радостно:
    Радуйся, обуреваемых тихое пристанище;
    Радуйся, сумнящихся известное утверждение.
    Радуйся, Едина Мати милосердия;
    Радуйся, скорая Помощнице сущим в бедах и напастех.
    Радуйся, скорбьми грехи наша очищающая;
    Радуйся, печалию наши немощи душевныя врачующая.
    Радуйся, суетныя радости мира сего презирати нас научающая;
    Радуйся, к вышнему миру ум наш возводящая.
    Радуйся, от любве земныя к Небесней Божией любви нас привлекающая;
    Радуйся, в самых страданиих наших утешение и благодатную жизнь нам подающая.
    Радуйся, обетование благ вечных;
    Радуйся, Ходатаице вечныя радости.
    Радуйся, Благодатная Богородице Дево, Погибших Взыскание и Всех Скорбящих Радосте.

    Кондак 3

    Силою свыше укрепи мя, Благая Владычице, недугующа телом и душею, и посещения Твоего сподоби и промышления, мрак уныния и скорби, облежащий мя, отгоняющи, да, спасаемый Тобою, непрестанно вопию Богу: Аллилуиа.

    Икос 3

    Имущи богатство милосердия неизреченное, всем скорбящим руку помощи простираеши, недуги врачующи, страсти исцеляющи. Не презри и мене, Благая Владычице, на одре немощи моея низлежаща и вопиюща Ти:
    Радуйся, милости сокровище многоценное;
    Радуйся, отчаянных едина надеждо.
    Радуйся, тела моего врачевание;
    Радуйся, души моея спасение.
    Радуйся, твердая крепосте немощных;
    Радуйся, изнемогающих Заступнице и укрепление.
    Радуйся, гнев Божий Твоим молением скоро утоляющая;
    Радуйся, страсти наша силою молитв Твоих укрощающая.
    Радуйся, слепых зрение, глухих слышание;
    Радуйся, хромых хождение, немых глаголание.
    Радуйся, болящих благонадежное посещение;
    Радуйся, яко Тобою, по мере веры, подаются благодатная исцеления всем немощствующим.
    Радуйся, Благодатная Богородице Дево, Погибших Взыскание и Всех Скорбящих Радосте.

    Кондак 4

    Буря многих бед и напастей обдержит мя, и волнения не ктому терплю. Ты же, яко Милостивая Мати Спаса моего и Бога, воздвигни руце к Сыну Твоему, молящи Его, да призрит на лютую скорбь сердца моего и воздвигнет мя из пучины отчаяния, вопиющаго Ему: Аллилуиа.

    Икос 4

    Слышащи, Пресвятая Дево и Мати, Симеона праведнаго проречение: Тебе же Самой душу пройдет оружие, слагала еси в сердце Твоем вся глаголы сии, разумевающи, яко радость матерняго сердца о чадех многих печалей в мире сем бывает причастна. Темже, яко искушенней по всяческим и спострадати матерней скорби могущей, взываем Ти:
    Радуйся, радость миру - Христа Спасителя рождшая;
    Радуйся, мир от скорбей избавляющая.
    Радуйся, хуления и клеветы на Сына Твоего терпевшая;
    Радуйся, страданием Его спострадавшая.
    Радуйся, скорбных матерей утешение;
    Радуйся, чад их благодатное охранение.
    Радуйся, в бедах скорое нам заступление;
    Радуйся, заблуждших исправление.
    Радуйся, младенцев питание;
    Радуйся, юных наставление.
    Радуйся, Мати сиротствующих;
    Радуйся, вдов заступление.
    Радуйся, Благодатная Богородице Дево, Погибших Взыскание и Всех Скорбящих Радосте.

    Кондак 5

    Боготочную Кровь Сына Твоего на Кресте за спасение наше изливаемую зрящи, яко Раба Господня, повинующися воли Отца, Иже на небесех, нам образ злострадания и терпения явила еси, да и мы, в пещи искушений и бед сущии, вопием смиренно Богу: Аллилуиа.

    Икос 5

    Видя Тя Сын Твой и Бог, при Кресте стоящую с возлюбленным учеником и сердцем Ему сраспинающуюся, глаголаше: "Жено, се, сын Твой", и ученику: "Се, Мати твоя", всыновляя Тебе вся верующыя в Него. Мы же, яко общницы скорби и страданий Сына Твоего, имеюще в Тебе Благую Матерь, на Тя все упование в скорби возлагающе, вопием Ти:
    Радуйся, Мати рода Христианскаго;
    Радуйся, усыновившая нас при Кресте Сына Твоего.
    Радуйся, Бога с человеки соединившая;
    Радуйся, верных Господеви сочетавшая.
    Радуйся, Агнице, рождшая Агнца, вземшаго грехи мира;
    Радуйся, чаше, черплющая нам радость от Источника безсмертия.
    Радуйся, споручнице спасения грешных;
    Радуйся, взыскание погибших.
    Радуйся, нечаянная грешных Радосте;
    Радуйся, падших востание.
    Радуйся, Целительнице всех немощей;
    Радуйся, утоление всякия печали.
    Радуйся, Благодатная Богородице Дево, Погибших Взыскание и Всех Скорбящих Радосте.

    Кондак 6

    Проповедуют милости Твоя, Богомати, вси концы вселенныя, ибо честным покровом Твоим покрываеши весь род Христианский, о нем же присно молишися Христу Спасителю нашему и избавляеши от всех бед благонравныя и богобоящияся рабы, верно вопиющыя Богу: Аллилуиа.

    Икос 6

    Возсия благодать светозарная от пречудныя иконы Твоея, Богомати, пред нею же со слезами припадающе, молим Ти ся: отжени облак нашедших на ны искушений, да вопием Ти радостно:
    Радуйся, приносящая к Сыну Твоему и Богу моления верных;
    Радуйся, и Сама у Престола Сына Твоего присно молящаяся о нас.
    Радуйся, Предстательнице к Богу, мир от бед спасающая;
    Радуйся, Заступнице рода Христианскаго, от Бога нам дарованная.
    Радуйся, древо благосеннолиственное, имже покрываются мнози;
    Радуйся, древо светлоплодовитое, имже питаются вернии.
    Радуйся, покрове миру, ширший облака;
    Радуйся, земле обетования, из нея же течет мед и млеко.
    Радуйся, ниво, растящая обилие щедрот;
    Радуйся, Подательнице всякия благости.
    Радуйся, Благодатная Богородице Дево, Погибших Взыскание и Всех Скорбящих Радосте.

    Кондак 7

    Хотящи явити токи чудес от святыя иконы Твоея "Взыскание погибших", повелела еси, Владычице, в погибели и печали сущим молебная пения пред тою совершати, и, получивши исцеление всем проповедати милости, ради тоя иконы явленныя, да не сокрыт будет источник благодатных врачеваний всем требующим. Темже и мы не таим Твоих благодеяний, но, благодарственне прославляюще Бога, вопием Ему: Аллилуиа.

    Икос 7

    Новая купель Силоамская паче оныя древния явися, Пречистая Владычице, храм Твой, в немже покланяемся чудотворней иконе Твоей: ибо не единою в лето и токмо первее входящим здравие тела подаеши, но всякий недуг и всякую язву душевную и телесную врачуеши с верою и любовию к Тебе прибегающих. Сего ради вопием Ти:
    Радуйся, купель, в нейже вся скорби наша погружаются;
    Радуйся, чаше, еюже радость и спасение восприемлем.
    Радуйся, каменю, напояющий жаждущыя жизни;
    Радуйся, древо, услаждающее сланыя воды житейскаго моря.
    Радуйся, животворныя воды неистощимый источниче;
    Радуйся, бане, омывающая греховную скверну.
    Радуйся, скорбей наших услаждение;
    Радуйся, печалей наших утоление.
    Радуйся, болезней наших врачевание;
    Радуйся, бед избавление.
    Радуйся, демонов попрание;
    Радуйся, врагов посрамление.
    Радуйся, Благодатная Богородице Дево, Погибших Взыскание и Всех Скорбящих Радосте.

    Кондак 8

    Странники и пришельцы вси есмы на земли сей, по глаголу Апостолову: беды от врагов, беды от сродник, беды от лжебратии терпяще в лишениих многих и скорбех. Ты же, Владычице, яко Благая Путеводительница, настави нас к тихому пристанищу и моли Сына Твоего прощению прегрешений нам прежде конца дароватися, да непристанно вопием Богу: Аллилуиа.

    Икос 8

    Все житие наше на земли болезненно и печали исполнено от клеветы, досаждения, укорения и иных многовидных бед и напастей, немощствует бо тело, изнемогает и дух наш. К Тебе убо прибегаем, Богомати, пред пречистою иконою Твоею припадающе, исполни радости и веселия скорбная сердца наша, да вопием Ти:
    Радуйся, Путеводительнице, к Небесному отечеству нас руководящая;
    Радуйся, Царице Неба и земли, врата райская нам отверзающая.
    Радуйся, Милостивная, нас милующая;
    Радуйся, Домостроительнице, житие наше добре устрояющая.
    Радуйся, руно орошенное, еже Гедеон предвиде;
    Радуйся, блаженное чрево, невместимаго всеми Бога вместившее.
    Радуйся, неопалимая купино;
    Радуйся, нерушимая стено.
    Радуйся, Живоносный источниче;
    Радуйся, цвете неувядаемый.
    Радуйся, умягчение сердец злых;
    Радуйся, умиление благих.
    Радуйся, Благодатная Богородице Дево, Погибших Взыскание и Всех Скорбящих Радосте.

    Кондак 9

    Всякая житейская в мире сем сладость печали бывает причастна: слава не стоит, богатство мимотечет, лепота и здравие увядают, друзи и искреннии смертию отъемлются. Услади убо наша скорби, благих Виновная, Твою нетленную дающи радость нам, вопиющим Богу: Аллилуиа.

    Икос 9

    Ветии многовещаннии недоумевают, киими словесы скорбящия и погибающия утешати, но Сама, Владычице, возглаголи сердцам нашим утешение, благодати Твоея лучами облак скорби нашея и мрак уныния разгоняющи, да взываем Ти:
    Радуйся, обрадовавшая надеянием на Тя всех Христиан;
    Радуйся, радость и умирение миру.
    Радуйся, подательнице Божественныя благости;
    Радуйся, надеждо благ вечных.
    Радуйся, кораблю хотящих спастися;
    Радуйся, пристанище житейских плаваний.
    Радуйся, верная хранительнице уповающих на Тя по Бозе;
    Радуйся, одеждо нагих дерзновения.
    Радуйся, хранительнице всех и утверждение;
    Радуйся, всех верных ограждение и священное прибежище.
    Радуйся, помоще верно молящихся Тебе;
    Радуйся, светлое благодати познание.
    Радуйся, Благодатная Богородице Дево, Погибших Взыскание и Всех Скорбящих Радосте.

    Кондак 10

    Спасти хотяй род человеческий от вечныя муки и непрестающия скорби, Человеколюбец Господь в приснодевственную утробу Твою вселися, и Тебе, Матерь Свою, дарова погибающим в помощь, покров и защищение, да будеши печальным утешение, погибшим взыскание, скорбящим радование, отчаянным надежда, вечныя муки Своим ходатайством избавляющая и к Небесному веселию приводящая всех, верно вопиющих Сыну Твоему и Богу нашему: Аллилуиа.

    Икос 10

    Стена еси девам, Богородице Дево, и всем к Твоему покрову прибегающим. Темже молим Тя, заступи, покрый и соблюди всех погибающих и безпомощных от искушений, озлоблений и бед, Тебе с любовию взывающих:
    Радуйся, столпе девства;
    Радуйся, чистоты и целомудрия сосуде избранный.
    Радуйся, воинствующим на плоть целомудрием изрядное венчание;
    Радуйся, во иночестве благоскорбящим подательнице вечнаго радования.
    Радуйся, пламень страстей изменяющая;
    Радуйся, мрак искушений прогоняющая.
    Радуйся, наставнице целомудрия;
    Радуйся, чистоты ограждение.
    Радуйся, человеков исправление;
    Радуйся, Еюже от падения нашего востахом.
    Радуйся, твердое веры утверждение;
    Радуйся, приятное молитвы кадило.
    Радуйся, Благодатная Богородице Дево, Погибших Взыскание и Всех Скорбящих Радосте.

    Кондак 11

    Пение всеумиленное приносим Ти, раби Твои, Богородице, яко всесильней Заступнице рода нашего: утоли болезни к Тебе прибегающих, укроти гнев Божий, праведно на ны движимый грех ради наших, избави нас от всякия лютыя скорби и погибели, вопиющих о Тебе Богу: Аллилуиа.

    Икос 11

    Светоприемная свеща, углем благодати Божия возжженная, явися нам пречестная икона Твоя, Владычице, на освящение наше и утешение. Мы же, любовию чтуще и с верою припадающе к ней, вопием Ти:
    Радуйся, сильным Твоим заступлением от всех бед нас избавляющая;
    Радуйся, от труса и потопа нас защищающая.
    Радуйся, от глада душевнаго и телеснаго нас снабдевающая;
    Радуйся, огнь росою молитв Твоих угашающая.
    Радуйся, от смертнаго губительства нас спасающая;
    Радуйся, в бранех крепкая Помощнице.
    Радуйся, от нашествия иноплеменных нас ограждающая;
    Радуйся, от междоусобныя брани охраняющая.
    Радуйся, плавающих легкое по водам прехождение;
    Радуйся, путешествующих добрая Водительнице.
    Радуйся, пленных свобождение;
    Радуйся, от належащаго праведнаго прещения Божия скорое избавление.
    Радуйся, Благодатная Богородице Дево, Погибших Взыскание и Всех Скорбящих Радосте.

    Кондак 12

    Благодати залог восхотевши дати роду нашему, цельбоносную икону Твою явила еси нам, Богомати, от неяже токи чудес с верою приходящим источаются, недузи врачуются и скорби утоляются. Сего ради радостно о Тебе вопием Богу: Аллилуиа.

    Икос 12

    Поюще Твоя милости и чудеса, Богородительнице, хвалим Тя вси, яко твердую Предстательницу нашу, и со умилением поклоняемся Тебе, молящейся о нас, и просим: воздвигни руце к Сыну Твоему, да всегда в сей жизни и по смерти нашей милосердие Его неотступно будет от нас, взывающих Ти:
    Радуйся, непостыдное наше упование в животе и по преставлении нашем;
    Радуйся, уповающим на Тя мирен конец жития сего подающая.
    Радуйся, в день судный наша Надеждо и Защищение;
    Радуйся, Судии праведнаго умоление.
    Радуйся, геенны вечныя избавление;
    Радуйся, Надеждо вечнаго спасения.
    Радуйся, ключу Царствия Христова;
    Радуйся, двере райская.
    Радуйся, мосте, к Небесем преводяй;
    Радуйся, всех кающихся грешников прибежище и Благая Заступнице.
    Радуйся, ангелов Радосте;
    Радуйся, всех праведных Славо и Утешение.
    Радуйся, Благодатная Богородице Дево, Погибших Взыскание и Всех Скорбящих Радосте.

    Кондак 13

    О, всепетая Богообрадованная Мати, рождшая на радость Небу и земли Царя Христа, Бога нашего! Услыши глас скорбящих и погибающих раб Твоих и, приемши сие малое моление наше, избави нас от всяких бед, скорбей и напастей; недуги наша исцели, напрасныя клеветы потреби, всяку злобу и вражду отжени от нас и будущия изми муки о Тебе вопиющих: Аллилуиа. Этот кондак читается трижды. Затем икос 1-й: Ангел предстатель, и кондак 1-й: Взбранной Воеводе.

    акафист

    Кондак 1

    Избранней от Бога грешных Заступнице, / благоизволившей взыскати овцы заблуждшия, / мы, недостойнии, соборное пение ныне принесем: / умоли, Богомати, Сына Твоего / неправды наша милосердием покрыти / и расточенныя вкупе собрати, / союзом крепким мира и любве соединивши, / да будет едино стадо и един Пастырь, / вси же благодатию спасеннии, да зовут Ти: // Радуйся, Благодатная Богородице Дево, Взыскание погибших.

    Икос 1

    Ангелов Творец в Совете Превечнем Святыя Троицы благоизволил послати Сына Своего на спасение мира смертию Единороднаго, по исполнении же времен послан бысть Архангел благовестити Тебе, Благодатней, о преславнем зачатии Твоем. Ты же рекла еси: «Се, раба Господня, буди ми по глаголу Твоему», и Слово Отчее плоть бысть и вселися в Тя. Темже, обрадованная, востекла еси ко Елисавете, и ею Духом Святым Материю Господа нареченная, песнь Всевышнему принесла еси, и нас научи пети Тя, яко Богородицу и Приснодеву:
    Радуйся, Дево, от веков Богоизбранная; радуйся, Матерь Божия явльшаяся.
    Радуйся, Свободителя мира рождшая; радуйся, начало спасения нашего.
    Радуйся, благодати живоносный источниче; радуйся, пламень молитвы неугасающий.
    Радуйся, Храм Бога Живаго, нас освящающий; радуйся, образ дивный на утешение нам явившая.
    Радуйся, Благодатная Богородице Дево, Взыскание погибших.

    Кондак 2

    Взирающе на образ «Взыскание погибших», зрим, како Отроча младо, Превечный Бог, открывает Тебе, Мати, волю Отца Небеснаго, Иже не хощет смерти грешника. Ты же, радуяся о таковей благости, просиши Сына Твоего, да ниспослет нам силу благодати зло в себе побеждати и творити благое, поющим Ему: Аллилуиа.

    Икос 2

    Разум человеческий недоумеет, како Дева вниде во Святая Святых, уготовляя Себе в чертог Небесному Царю, храм убо Божий есть истинное Твое, Богородице, жилище, Твое на земли небо, идеже с Сыном пребываеши и с верою молящихся спасительным Таинствам приобщаеши. Простри же покров Твой на нас и на чад наших, и в единомыслии всех соблюди, да единодушно славим Тя:
    Радуйся, трапеза Церкви Христовой; радуйся, Агнца Божия Мати.
    Радуйся, союзом любве супругов соединяющая; радуйся, чадородием родителей веселящая.
    Радуйся, от купели Крещения благая Восприемнице; радуйся, бедствия сиротства скорое избавление.
    Радуйся, скорби матерей утоляющая; радуйся, Всепетая, мирное житие устрояющая.
    Радуйся, Благодатная Богородице Дево, Взыскание погибших.

    Кондак 3

    Силу и славу Божества премудро сокры воплощенное Слово Отчее: Сын Божий наречеся Сын Человеческий, сниде на землю, яко Пастырь добрый, душу Свою за овцы полагающий; в дебрях греха заблуждших ища, всех глашая по имени и смывая скверну в источнике покаяния. Насладившеся же пажитию приятною, яко овцы словесныя благодарственно воззовем Ему: Аллилуиа.

    Икос 3

    Имущи попечение о спасении грешников, всяк день, Божия милосердия светильник возжегши, ищеши прилежно, Владычице, яко жена евангельская, драхму утерянную, сиречь душу, образ Божий утратившую и страстьми помраченную. Тую обретши, радуешися и в горнило раскаяния ввергаеши ю, да обновится житием, воспевая Ти сице:
    Радуйся, добраго Пастыря Мати; радуйся, грешников к небу воззвание.
    Радуйся, спящей совести пробуждение; радуйся, слезному покаянию научающая.
    Радуйся, наша пред Богом Споручнице; радуйся, праведнаго Божия гнева смягчение.
    Радуйся, кающихся исправление благодатное; радуйся, исполняти заповеди силу подающая.
    Радуйся, Благодатная Богородице Дево, Взыскание погибших.

    Кондак 4

    Бурю блуднаго сына страстей укротив, объятия Твоя отверзл еси ему, Господи. И жене грешнице, слезами нозе Твои омывшей, рекл еси: «Прощаются ти греси твои». Не судити бо мир посла Отец Сына Своего, но дати спасение, посему радость велия бывает на небеси о грешницех кающихся, Ангелом поющим: Аллилуиа.

    Икос 4

    Не слушают гласа добраго Пастыря грешницы, во глубину зол впадшии, презревшии страх Божий и сладостию греха прельщеннии. Кто же упасет сих, идущих по пути к погибели, аще не Ты, Мати Милосердия? Возносиши бо к Сыну Твоему глас плачевный матерей сих несчастных, силою состраждущей любве облегчаеши их борения, да обретши благодатную помощь и надежду спасения, благодарят Тя сице:
    Радуйся, руку милосердия погибающим простирающая; радуйся, во вражде сущих примиряющая.
    Радуйся, падших благое взыскание; радуйся, тайных пороков врачевание.
    Радуйся, Еюже клевета и коварство обличается; радуйся, Еюже пламень сластолюбия угашается.
    Радуйся, отчаянных надеждо последняя; радуйся, к жизни добрей возвращение.
    Радуйся, Благодатная Богородице Дево, Взыскание погибших.

    Кондак 5

    Божественным светом любве осияв души озлобленнии Христос Бог, сколь многим страждущим благотвори: слепцы просвети, прокаженныя очисти, хромыя и разслабленныя исцели, алчущия хлебом напита. Верою же исцеление приявшии, всех болящих увещевают предатися милосердию и всемогущей силе Врача Небеснаго, поюще Ему: Аллилуиа.

    Икос 5

    Видим, како изливается источник цельбоносный благодатнаго утешения молящимся пред иконою Твоею, Владычице: недугующии силою веры воздвизаются, унывающии ободрение получают, печаль в радость претворяется. Самые страдания многим обращаеши на пользу ко врачеванию язв душевных, ихже свободишеся, благодарственно зовем Ти:
    Радуйся, Мати Врача Небеснаго; радуйся, Твоими молитвами исцеляющая.
    Радуйся, Причастия Святых Таин сподобляющая; радуйся, тяжкоболящих благое посещение.
    Радуйся, в немощи помощь всесильная; радуйся, разслабленных членов укрепление.
    Радуйся, слепых прозрение, хромых хождение; радуйся, умом обиженных защито и утешение.
    Радуйся, Благодатная Богородице Дево, Взыскание погибших.

    Кондак 6

    Предуказанную Богом Отцем чашу страданий за грехи рода нашего испити готовяся, Христе Боже наш, в вертограде Гефсиманстем трикраты молился еси: «Аще возможно есть, да мимоидет от Мене чаша сия: обаче не Моя воля, но Твоя да будет». Егда же воззовет нас Господь на подвиг или скорбныя обстояния постигнут нас, сию молитву вложим в уста наша, да бодрствуем и поем во вся дни: Аллилуиа.

    Икос 6

    Воззрев милостиво на грешную Марию, возопившую Тебе, Богородице: «Ныне буди ми ко спасению, Наставнице», направи ю в пустыню Иорданскую. Тамо укрепила еси ю в подвиге покаяния, яко достигшую равноангельнаго жития, в чертог Сына Своего ввела еси. Такожде и нас, Благодатная, научи восходити по пути покаяния, да вкупе с угодившими Богу поем Ти:
    Радуйся, веры и благочестия Наставнице; радуйся, в подвизех Помощнице неизменная.
    Радуйся, воздержания богоугоднаго оправдание; радуйся, молитвы Споспешнице усердная.
    Радуйся, страха Божия насаждение; радуйся, целомудрия Блюстительнице неотступная.
    Радуйся, любве и милосердия источниче; радуйся, смирением в горняя приводящая.
    Радуйся, Благодатная Богородице Дево, Взыскание погибших.

    Кондак 7

    Яко знамение вольнаго истощания Твоего, Господи, Крест Твой на рамо взял еси и к месту лобному пошел еси. Ты же, о Богомати, востекла еси вслед Сына Твоего, утробою болезнуя и ничтоже вопреки глаголя, нас же научая пети Ему: Аллилуиа.

    Икос 7

    Новая свеща любве возгореся во тьме мира сего, егда Агнец Божий вознесе грехи наша на Древо. Се, Матерь Божия у Креста Сына Своего усыновляет Себе род человеческий и, бремя грехов разделяя, восприемлет и мира наказание, о Всенепорочная Дево, скорбь крестную в послушании воле Отца растворившая! Укрепи сердце наше в дни бедствий, да сице песнословим величие Твое:
    Радуйся, Агнице, Агнца на заклание приведшая; радуйся, крестный путь Сына Твоего слезами оросившая.
    Радуйся, муки Его сердцем разделившая; радуйся, крест яко орудие взыскания грешных вземшая.
    Радуйся, от благовещения и до гроба Сыну послужившая; радуйся, Раба Господня, волю Отца тем исполнившая.
    Радуйся, сердца скорбнаго отрадо; радуйся, идущих тесным путем небесная наградо.
    Радуйся, Благодатная Богородице Дево, Взыскание погибших.

    Кондак 8

    Странных сомнений волны потопляют нас в море житейском, и в страхе вопием Ти: «Господи, спаси ны, погибаем». И слышим глас вездесущаго Слова, не токмо Петру, но всем глаголющий: «Почто усомнился еси?». Устыдимся же, малодушнии, силою благодати укрепляеми, ум свой с верою устремим к Богу Крепкому, Живому, взывающе: Аллилуиа.

    Икос 8

    Всякую душу из тьмы заблуждения хотя избавити, Богомати, девице Екатерине в сонном видении Младенца Христа показа, и ко Крещению привела еси. Христос же Господь мудрую деву обручи в невесты Себе, и яко исповедницу веры прослави, мученическим венцем же украси ю, и Царствия Небеснаго сподоби. Мы же премудрости Божией удивляющеся, Наставницу заблуждших сице восхвалим:
    Радуйся, Света Истиннаго Мати; радуйся, души омраченныя просвещение.
    Радуйся, бури смущений разсеяние; радуйся, мира и тишины водворение.
    Радуйся, веры истинныя утверждение; радуйся, волны сомнения о камень веры разбивающая.
    Радуйся, православия тихий свет сохраняющая; радуйся, стадо Христово во едино собирающая.
    Радуйся, Благодатная Богородице Дево, Взыскание погибших.

    Кондак 9

    Всякое существо человеческое, любовию Божественною согретое, к Богу в Троице славимому возносится, Виновнику жизни и безсмертия. Душа же наша, познавши, яко любовь есть блаженство общения, вопиет Ему: «Благодетелю мой, даждь ми, да весь пребуду в Тебе, Ты же во мне», да еси едино будем и согласно воспоем: Аллилуиа.

    Икос 9

    Весь мир во зле лежит, от разжжения злобы раждаются кровопролитныя брани, Мати мира, человеки с Богом примирившая, водвори мир и тишину во вселенной! Избави Отечество наше от нашествия вражия, мирный же труд наш на пользу душевную благослови, да вси тако восхвалим присное заступление Твое:
    Радуйся, Благословенная, вражды разрушение; радуйся, благодати море неисчерпаемое.
    Радуйся, злая сердца умягчающая; радуйся, ненависть силою любве истребляющая.
    Радуйся, противу врагов помоще победоносная; радуйся, града Москвы охрана неусыпающая.
    Радуйся, Отечества нашего крепкое миром ограждение; радуйся, мира всея вселенныя утверждение.
    Радуйся, Благодатная Богородице Дево, Взыскание погибших.

    Кондак 10

    Спасаяй мир излиянием пречистой крови Твоей, прорекл еси, Христе Царю: «Аще Аз вознесен буду от земли, вся привлеку к Себе». Тогда же показал еси страданий Твоих силу животворную: разбойнику рай отверзается, сотник Сыном Божиим Тя исповедует, мы же язвами Твоими от древния клятвы свободившеся, из глубины сердца взываем: Аллилуиа.

    Икос 10

    Стена еси нерушимая, Благая Мати, от нападений врагов невидимых, ищущих, кого поглотити или разбити о камень злоключений и бед. Око недремлющее, зриши врага приближение и надеющихся на Тя от всяких обстояний спасаеши, да вси познают предивное Твое Промышление, сице взывающе:
    Радуйся, Державная, духа злобы отгнание; радуйся, внезапныя смерти свобождение.
    Радуйся, огненнаго запаления избавляющая; радуйся, сущих во мразех согревающая.
    Радуйся, утопающих дивное спасение; радуйся, без вести пропавших обретение.
    Радуйся, губительных болезней прекращение; радуйся, Милостивая, от напастей злых исхищающая.
    Радуйся, Благодатная Богородице Дево, Взыскание погибших.

    Кондак 11

    Пение надгробное и плач Богородицы, и повитие Плащаницею от Иосифа с Никодимом благоволил еси приняти, Жизнодавче Христе, егда прешел еси врата смерти, яко Богочеловек, плотию уснув. Сын Человеческий душу Свою положи за грешники, явив тем любовь Свою к роду человеческому, ад же облиста силою Божества, да вся преисподняя трепещет, слышавши ангельскую песнь: Аллилуиа.

    Икос 11

    Света невечерняго Мати, едина падших исправление! Просвети, очисти, обнови лукавое житие наше, да не приидем ко гробу нашему, токмо бремя грехов носяще. Ты бо милостиво приемлеши последнее воздыхание кающихся и силою благодати от неистовых истязателей души верных свобождаеши. Буди нам Путеводительница во обители вечныя, идеже вси праведнии пребывают: ныне же немолчно глаголем Ти:
    Радуйся, Победителя смерти рождшая; радуйся, подвижников сила неоскудевающая.
    Радуйся, памяти смертной дарование; радуйся, тяжких грехов нечаемое разрешение.
    Радуйся, престарелых упокоение желанное; радуйся, умирающих о Господе сретение.
    Радуйся, надеждо вечнаго спасения; радуйся, о нераскаянных даже до Страшнаго Суда Ходатаице.
    Радуйся, Благодатная Богородице Дево, Взыскание погибших.

    Кондак 12

    Благодати источник приснотекущий открыл еси миру, Христе Спасе, Воскресением Твоим: умертвися смерть, пленен бысть ад, небо и рай верным отверзошася. Сыне Божий! Соделай нас верою сынами света, да внидем, молитвами Богородицы, в чертог славы Твоея с песнию: Аллилуиа.

    Икос 12

    Воспевающе благодеяния Твоя, Богородице, роду христианскому, славословим Твое к грешным милосердие, величаем о заблуждших промышление, песнословим теплое о мире предстательство. Сокровищнице даров Духа Святаго! Изливай обильно благодать и милость всем унывающим и бедствующим, благодарным сердцем приносящим Ти похвальныя:
    Радуйся, тайны искупления Провозвестнице; радуйся, Мати Сына Божия, главу змия стершаго.
    Радуйся, Благодатная, яко сотвори Ти величие Сильный; радуйся, яко величие сие почитанием иконы Твоея возвещается.
    Радуйся, теплыя слезы о мире проливающая; радуйся, и во Успении Твоем нас не оставляющая.
    Радуйся, Церкви Христовой покров и радование; радуйся, Благая Вратарнице, двери райския верным отверзающая.
    Радуйся, Благодатная Богородице Дево, Взыскание погибших.

    Кондак 13

    О Богоизбранная Дево, Взыскание погибших и Наставнице заблуждших! Пролей теплыя о нас слезы, просвети души, во мраце отчаяния сущия, и на путь заповедей настави, да не будем овцы погибшия, но к Сыну Твоему и Богу нашему всех приведи, Иже спасает Тобою души наша, да радостно вопием Ему: Аллилуиа. Этот кондак читается трижды, затем икос 1 и кондак 1.

    Молитва 1

    О Богоизбранная Заступнице грешных, Взыскание погибших и Наставнице заблуждших! Ты не презираешь удалившейся своеволием от пажити Сына Твоего блуждающей в дебрех греха бедныя словесныя овцы, но шед, ищешь заблуждшую. Кто изследит пути милосердия Твоего? Будь милостива ко всем: погибающих извлеки из бездны погибели, заблуждших обрящи и настави, удаленных обрати и привлеки, обращающихся к Тебе и приближающихся приими и спаси. Всех же кающихся к Сыну Твоему, доброму Пастырю и Богу нашему, приведи, да молитвами Твоими не будет ни единыя овцы, без вести пропавшия, но да будет едино стадо и един Пастырь, Иже упасет души наша и открыет ходатайством Твоим двери во обители вечныя. Аминь.

    Молитва 2

    О Пресвятая Владычице Богородице, Взыскание погибших! Призри милостивым Твоим оком на молящихся пред честною иконою Твоею. Воздвигни нас из глубины греховныя: просвети ум наш, омраченный страстьми, уврачуй язвы душ и телес наших. Ты веси непрестающия скорби и вся немощи наша: подай нам руку помощи, облегчи страдания. Буди нам милосердия и мира источник, утешение в бедах и крепкое прибежище грешником кающимся. Даруй нам исправление греховныя жизни нашея: заблуждших на путь правый настави, падших и погибающих силою благодати спаси. От внезапныя смерти избави, с Сыном Твоим и Судиею Праведным нас примири и вечныя муки свободи. Милосердным же предстательством Твоим сподоби нас вселитися во обителех небесных, идеже непрестанный глас празднующих радостно славит Пресвятую Троицу, Отца и Сына и Святаго Духа, ныне и присно и во веки веков. Аминь.

    акафист

    Кондак 1

    Избранное и дивное избавление нам даровася — Твой образ честный, Владычице, яко избавльшеся от погибели вечныя теплою к Тебе пред ним молитвою, благодарственное пение приносим Ти раби Твои, со умилением зовуще: Радуйся, Благодатная Богородице Дево, всех погибающих спасающая.

    Икос 1

    Ангели и Небесныя Силы хвалят Тя, Богомати, яко скорую христиан Заступницу, Ты бо обрадовала еси у образа Твоего, Тебе возглашающих сице: 
    Радуйся, яко Тобою вся вселенная светлыя радости исполняется. 
    Радуйся, яко Твоим предстательством скорби разрушаются. 
    Радуйся, погибающим нечаянное спасение. 
    Радуйся, уповающим на Тя милующая Матерь и Покров. 
    Радуйся, уныние падших на радость прелагающая. 
    Радуйся, яко Тобою даруется исправление греховныя жизни нашея. 
    Радуйся, Благодатная Богородице Дево, всех погибающих спасающая.

    Кондак 2

    Вся Небесныя силы дивятся, видящи Тя непреложную молитвенницу за христианы к Сыну Твоему. И мы, грешнии, осияваемыя образа Твоего боголепным сиянием, от негоже даруется нам скорое поможение, недоумея славити Тя по достоянию, зовем: Аллилуиа.

    Икос 2

    Разум подаждь нам погибающим в скорби нашей, Заступнице усердная, Ты бо объемлеши покровом милости Твоея во всякой нужде зовущих со умилением таковая: 
    Радуйся, в недоуменный час печали помыслы полезная нам низпосылающая. 
    Радуйся, обуреваемых страстьми и болезнующих сердцем благодатно врачующая. 
    Радуйся, скорое преодоление греховных навыков. 
    Радуйся, прибегающих к Тебе от страсти пиянства избавляющая. 
    Радуйся, грешников к благодатней жизни возставляющая. 
    Радуйся, во всяких бедах наших скорая Утешительнице. 
    Радуйся, Благодатная Богородице Дево, всех погибающих спасающая.

    Кондак 3

    Сила Господа Иисуса Христа осени Тя, Владычице, ко взысканию всех погибающих в бедах и скорбех и Твоея помощи просящих: Тебе бо дадеся благодать всякия облежащия ны беды прогоняти, да, спасаемии Тобою, вопием Богу: Аллилуиа.

    Икос 3

    Имея к роду человеческому велию милость, Ты, Богоневесто, покрываеши покровом Твоея благости всех почитающих Тя и молящихся Ти о заступлении. Темже простри руку помощи и нам вопиющим со умилением таковая: 
    Радуйся, поношения и клеветы отъемлющая.
    Радуйся, неправедная советы разрушающая.
    Радуйся, от неправеднаго осуждения спасающая. 
    Радуйся, от уз и темниц избавляющая. 
    Радуйся, от изгнания возвращающая. 
    Радуйся, всем просящим у Тебе милости помогающая. 
    Радуйся, Благодатная Богородице Дево, всех погибающих спасающая.

    Кондак 4

    Буря бед и печалей житейских обдержит ны, Небесная Царице, мы же с надеждою на Твое предстательство поклоняемся чудотворней иконе Твоей, ибо веруем, яко взыщеши нас погибающих и зовущих: Аллилуиа.

    Икос 4

    Слыша Господь Твоя о нас ходатайства, Богородительнице, исполняет Твоя прошения. Сего ради и мы, грешнии, в скорбех наших погибающии, взирая на Твою святую икону, дерзаем глаголати сицевая: 
    Радуйся, неплодных родителей всерадостное разрешение. 
    Радуйся, матерей скорбящих утешение. 
    Радуйся, сиротствующих незримое воспитание. 
    Радуйся, падших юношей и дев исправление. 
    Радуйся, открывающая мудрость учения недоумевающим. 
    Радуйся, светлое Солнце, согревающее нас лучами милостей и щедрот.
    Радуйся, Благодатная Богородице Дево, всех погибающих спасающая.

    Кондак 5

    Боготечней звезде подобну, явила еси икону Твою святую, Богородице, в скорбнем мире жития сего заблудшим, еюже осени и нас, в греховней тьме сущих, да вопием Спасителю нашему: Аллилуиа.

    Икос 5

    Видяще Твоя теплая к Богу моления о всех страждущих и многоразлично недужных, ублажаем Тя, благословенная Целительнице наша, радостная приносяще похвалы сия: 
    Радуйся, врачами оставленных на Свое попечение премлющая. 
    Радуйся, исцеляющая неисцельныя болезни телес наших. 
    Радуйся, от помрачения душевнаго скоро свобождающая. 
    Радуйся, озлобленная сердца покаянием и слезами врачующая. 
    Радуйся, скорби временныя ко исправлению нам посылающая. 
    Радуйся, из глубины греховныя нас извлачающая.
    Радуйся, Благодатная Богородице Дево, всех погибающих спасающая.

    Кондак 6

    Восхваляют и славят Тя, Богородице Дево, пророцы, Апостоли и вси святии, имже подражающе и мы, грешнии, предстоя святей Твоей иконе, вопием о Тебе Богу: Аллилуиа.

    Икос 6

    Возсияла еси милостивою благостынею к нам, Богородице, от невечерняго света Сына Твоего и Бога, Того бо лучами согреваеши всех труждающихся и обремененных, зовущих Тебе таковая: 
    Радуйся, Домостроительнице всеблагая, житие наше добре устрояющая. 
    Радуйся, благословение добрых житейский начинаний. 
    Радуйся, добрая девам Наставнице. 
    Радуйся, невест благая Украсительнице.
    Радуйся, подательнице мира душевнаго. 
    Радуйся, Ходатаице нам вечныя радости.
    Радуйся, Благодатная Богородице Дево, всех погибающих спасающая.

    Кондак 7

    Хотящи явити токи чудес от святыя иконы Твоея «Взыскание погибших», повелела еси, Владычице, молебная пения пред тою совершати и получившим исцеление – проповедати милости, Тобою явленная. Темже и мы не таим Твоих благодеяний, благодарно поюще: Аллилуиа.

    Икос 7

    Дивную и спасительную благодать показа нам Господь в явлении чудотворнаго образа Твоего, Богородице. Сего ради, сподобльшеся неисчетных Твоих благодеяний, благоговейно лобызаем оный, благодарно взывающе Ти таковая: 
    Радуйся, изгибших чудесное обретение. 
    Радуйся, от холода и мраза погибающих дивное спасение. 
    Радуйся, по молитвам матерей чада их охраняющая. 
    Радуйся, семейныя распри и раздоры утоляющая. 
    Радуйся, пострадавшим за истину скорое оправдание.
    Радуйся, Предстательнице к Богу, мир от бед избавляющая.
    Радуйся, Благодатная Богородице Дево, всех погибающих спасающая.

    Кондак 8

    Странники и пришельцы, дальнии и ближнии притекают в храм Твой, Пречистая Дево, и слезно молят Тя, Владычице: умилосердися о всех грешных и заблуждших да не погибнем зле, но, спасеннии Тобою, возопиим Творцу всяческих: Аллилуиа.

    Икос 8

    Всех падших благодатно возставляющи, Заступнице всеблагая, исполни ныне прошение и нас, погибающих, и возносящих смиренная моления наша, вопиющих Ти сицевая: 
    Радуйся, Радосте наша, образом Твоим нас утешающая. 
    Радуйся, не гнушающаяся всеми презренных и отверженных. 
    Радуйся, Отрадо всех, правды ради гонимых. 
    Радуйся, Заступнице обидимых. 
    Радуйся, обидящих скорое вразумление. 
    Радуйся, всех грешных с Богом примирение. 
    Радуйся, Благодатная Богородице Дево, всех погибающих спасающая.

    Кондак 9

    Всеми Небесными Силами прославляемая, являеши, Небесная Заступнице, матернее милосердие всем притекающим к Твоему заступлению. Тако и нам, просящим ныне Твоея помощи, буди Радостию и Утешением, да благодарно вопием Богу: Аллилуиа.

    Икос 9

    Вития многовещанныя недоумевают о многообразных чудесех Твоих, Богородице, яже от святыя иконы Твоея совершаются многообразно. Мы же, сему дивящеся, глаголем Тебе сице: 
    Радуйся, многоразличных дарований просящим подательнице. 
    Радуйся, сирых, вдовиц и убогих Питательнице. 
    Радуйся, немощныя старости подкрепление. 
    Радуйся, едина Надежда отчаянным. 
    Радуйся, молитвеннице теплая об отпавших от Православныя веры. 
    Радуйся, тихое пристанище утомленных бурями житейскаго моря. 
    Радуйся, Благодатная Богородице Дево, всех погибающих спасающая.

    Кондак 10

    Спасительное взыскание в погибели сущим присно даруеши, Богородице Дево, и наставляеши на путь спасения всех, умиленно с сокрушенным сердцем поющим Создателю нашему: Аллилуиа.

    Икос 10

    Стенание и вопль нас, погибающих, услыши, о милующая Мати Господа нашего, да от бед и напастей Тобою избавляеми, вопием Ти благодарственная сия: 
    Радуйся, смирение в души наша вселяющая. 
    Радуйся, волны страстей греховных в сердцах наших утишающая. 
    Радуйся, о всех падших матерния слезы проливающая. 
    Радуйся, во святом житии верныя утверждающая.
    Радуйся, благую христианскую кончину им подающая.
    Радуйся, врата райская отверзающая. 
    Радуйся, Благодатная Богородице Дево, всех погибающих спасающая.

    Кондак 11

    Пение всеумиленное приносяще Ти со умилением, просим Тебе, Дево Богородице: не презри гласа рабов Твоих, к Тебе бо в погибели и скорби прибегаем и пред Тобою в бедах наших слезы проливаем, поюще: Аллилуиа.

    Икос 11

    Светоподательную свещу сущим во тьме греха и уныния зрим Святую Деву: освещаеши бо всю вселенную лучами чудес Твоих, имиже озаряеми, благодарная приносим Ти глаголы: 
    Радуйся, крепкое утверждение Православныя веры.
    Радуйся, отечества нашего надежное заступление.
    Радуйся, православных правителей его славо.
    Радуйся, благочестивых святителей и пастырей благословение.
    Радуйся, от междоусобий миром и любовию нас ограждающая.
    Радуйся, от враг видимых и невидимых нас защищающая.
    Радуйся, благодатная Богородице Дево, всех погибающих спасающая.

    Кондак 12

    Благодать Божественную испроси нам у Сына Твоего и Бога, простри нам руку помощи, взыщи нас погибающих и приими в вечныя кровы, Богородительнице, да, радующеся поем Богу, Тобою нас спасающему: Аллилуиа.

    Икос 12

    Поюще Твоя чудеса, от иконы Твоея «Взыскание погибших» бываемая, веруем, яко даруеши радость и нам, сердцем и усты Тебе приносящим таковая:
    Радуйся, христиан непостыдное Упование.
    Радуйся, верных спасительное Прибежище.
    Радуйся, ненадежных надеяние.
    Радуйся, от всех бед скорое избавление.
    Радуйся, Отрадо в день смерти.
    Радуйся, едина надеждо и по смерти.
    Радуйся, Благодатная Богородице Дево, всех погибающих спасающая.

    Кондак 13

    О, Всепетая Мати! Вечную Радость миру Рождшая! Нынешняя приемши мольбы, избави нас от всякия нужды и печали, яви нам скорую Твою помощь и подаждь отчаянным — отраду, страждующим — исцеление, падшим — возстание, погибшим — взыскание, да благодарно вопием Богу: Аллилуиа. (Трижды)

    Молитва

    О, Пресвятая и Преблагословенная Дево, Владычице Богородице! Призри милостивым Твоим оком на нас, предстоящих пред святою иконою Твоею и со умилением молящихся Тебе. Воздвигни нас из глубины греховныя, просвети ум наш, омраченный страстьми и уврачуй язвы душ и телес наших. Не имамы бо иныя помощи, не имамы иныя надежды, разве Тебе, Владычице; Ты веси вся немощи и согрешения наша, к Тебе прибегаем и вопием: не остави нас Твоею небесною помощию, но предстани нам присно Твоим неизреченным милосердием и щедротами. Спаси и помилуй нас погибающих, даруй нам исправление греховныя жизни нашея, и избави нас от скорбей, бед и болезней, от напрасныя смерти, ада и вечныя муки.Ты бо Царице и Владычице, скорая Помощница и Заступница всем притекающим к Тебе, и крепкое прибежище кающихся грешников! Подаждь убо нам, Преблагая и Всенепорочная Дево, христианский конец живота нашего, мирен и непостыден, и сподоби нас Твоим ходатайством вселитися в Обителех Небесных, идеже непрестанный глас празднующих радостно славит Пресвятую Троицу, Отца и Сына и Святаго Духа, ныне и присно, и во веки веков. Аминь.

    акафист

    Кондак 1

    Взбранной Воеводе, заступнице рода христианскаго, дарованной Богом на взыскание и спасение погибающих, благодарственное приносим Ти, Богородице, пение. Ты же, яко Всемилостивая Мати милосердия, всех нас помилуй, заступай, да зовем Ти:
    Радуйся, милосерднейшая Мати, на спасение нас настав¬ляющая и от бед избавляющая.

    Икос 1

    Яко ангел во плоти бысть первозданный человек, славою и честию венчанный, и малым чем от Ангел умаленный, гордыней же и преслушанием Творца и Создателя., по прелести диавола, на тяжкия труды и скорби из рая изгнанный. Недугуя той же гордыней и завистию, низвергающей нас в пучину бед и скорбей, к кому прибегаем, аще не к Тебе, единей Матери милосердия и Взысканию погибших. Виждь наши беды и скорби, имиже лукавый враг хощет нас погубити. Но Ты, Пречистая, разруши его злохитрости и коварства, да избавльшеся, славим Тя, твердую заступницу, и радуюшеся вопием Ти:
    Радуйся, Мати неизреченнаго милосердия.
    Радуйся, единое Взыскание погибших.
    Радуйся, помрачение смысла отгоняющая.
    Радуйся, души хладныя Своею милостию согревающая.
    Радуйся, Надежда ненадежных.
    Радуйся, самых отчаянных из глубины зол исхищающая.
    Радуйся, милосерднейшая Мати, на спасение нас наставляющая и от бед избавляющая.

    Кондак 2

    Видя Отец наш небесный погибающий род человеческий, благоволи для спасения его послати на землю во плоти Единороднаго Сына Своего, Господа нашего Иисуса Христа. Послужив сей тайне воплощения Спасителя миру, Ты, Пресвятая Дево, удостоила хотящих спастися воспевати вечно благодарственную песнь: Аллилуия.

    Икос 2

    Разум человеческий, по глаголу апостола, коль многое множество прелестию змиинною низринух в бездну греха и погибели, в пучину лютых бед и скорбей, но ты, многогрешная и многоскорбная душа моя, присно уловляемая врагом спасения в сети гордыни и тмочисленных грехов, обратись к Божией Матери и с хотящими спастися воззови:
    Радуйся, гордыню и сомнения от нас отгоняющая.
    Радуйся, познати уму нашему непостижимое воспрещающая.
    Радуйся, глубин промысла Божия мудросте неизследимая.
    Радуйся, в смиренном послушании воле Божией нас пребывати научающая.
    Радуйся, милосерднейшая Мати, на спасение нас наставляющая и от бед избавляющая.

    Кондак 3

    Сила Божия, исхитившая из челюсти врага спасения толикое множество погибающих грешников, да изведет Твоим милосердием и заступлением, о Мати щедрот и Взыскание погибших, и нас из бездны греховной, и на путь истиннаго покаяния и спасения наставит и научит пети Богу: Аллилуиа.

    Икос 3

    Имущее неизреченное милосердие ко взысканию погибающих грешников,Ты, Милосерднейшая Мати, блудников содеваеши целомудренными, обдержимых пьянственною страстию — трезвыми, разбойников и злонравных - кроткими, жестокосердных и немилостивых — любвеобильными и сострадательными, болящих душевно и телесно — совершенно здравыми. Умилосердись и о нас, Пресвятая Богородице, и вместо печали даруй нам радость, да воспеваем Тя, Всепетая Владычице, сице:
    Радуйся, Всеблагая Матерь грешников.
    Радуйся, Всемилостивая Взыскательнице погибших.
    Радуйся, истинная Наставнице заблудших.
    Радуйся, несомненная Надеждо всех страждущих.
    Радуйся, Помощнице всех требующих Твоея помощи и заступления.
    Радуйся, милосерднейшая Мати, на спасение нас наставляющая и от бед избавляющая.

    Кондак 4

    Буря многих страстей, душевных и телесных, присно воздвизается врагом спасения, но хотящих благочестно жити милостивым кротким оком, Богородительнице, и милосердием Твоим призри на нас, недостойных, и от напастей вражиих свободи призывающих Тя на помощь и вопиющих Богу: Аллилуиа.

    Икос 4

    Слышаще о Твоем неизреченном милосердии к роду христианскому, яко Ты еси, Пречистая Дево, надеждо и нерушимое наше утверждение и от лютых бед освобождение, от печали утешение, душам нашим просвещение и во уповании нашем великий и непоколебимый столпе и из зловерия и идолослужения к свету истинныя веры нас приводящая, темже вопием Ти:
    Радуйся, жити хотящих в правоверии всемощная помощница.
    Радуйся, верная и надежная Путеводительница ко спасению.
    Радуйся, всем ходящим в законе Господни двери райския отверзающая.
    Радуйся, милосерднейшая Мати, на спасение нас наставляющая и от бед избавляющая.

    Кондак 5

    Боготечную звезду и тихое пристанище на пути спасения имамы Тя, Богородице, и обуреваемые волнами лютых бед и скорбей от враг видимых и невидимых, с верою и благоговением вопием Ти: души наша сохрани покровом Твоим, Преблагословенная Богородице, и от различных бед и скорбей избави нас и да не порадуется враг о погибели нашей, но да славим Тя, Божию Матерь, и во веки Богу поем: Аллилуиа.

    Икос 5

    Видевши несчетныя Твоя, Богомати, милости, излиянныя и непрестанно изливаемыя на род христианский, вернии сооружиша множество святых храмов, посвященных паче всего Твоему святому имени и покрову, и аще на всяком месте Ты для всех нас милосердная Мати, наипаче же во святых храмах прибегающим к Тебе, воистннну Ты радость в печаль погруженным, Ты болящим исцеление и покров всем вопиющим Ти сицевая:
    Радуйся, Матерь Божия, на всяком месте, наипаче же в храмах Божиих, покровом млостей Твоих нас покрывающая.
    Радуйся, молящихся пред святою иконою Твоею, во всех бедах и злоключениях, вся благая и полезная для жизни дарующая.
    Радуйся, всякой отрадой и утешением сердца верных исполняющая.
    Радуйся, никогдаже уповающих на милость Божию и Твое предстательство не оставляющая.
    Радуйся, милосерднейшая Мати, на спасение нас наставляющая и от бед из избавляющая.

    Кондак 6

    Проповедницы и свидетелие Твоих неизреченных милостей явишася святые Твоя, Богомати, иконы, паче же чудотворная и достопочтимая из них, именуемая Взыскание погибших, яко же новая луна явися, озаряя сущих во тьме и приводя к свету богоразумия, темже молим Тя , от тьмы адския избави Твоя рабы и в вечной славе пети Творцу Богу сподоби: Аллилуиа.

    Икос 6

    Возсия верным благодать Божия и Твой, Богомати, покров и заступление на всяком месте, яко Ты еси Пречистая Дево, сущим в бедах прибежище, немощным помогаеши, грешники исправляеши и ко спасению наставляеши, темже мы со умилением притекаем к тихому сему и доброму пристанищу, скорой Помощнице, готовому и теплому спасению - покрову Девы и из глубины души воззовем:
    Радуйся, Мати Божия, во дни и в нощи, на всякий день и час Своим честным омофором нас покрывающая.
    Радуйся, в пути, трудах, на суше и на водах усердная наша Помощнице.
    Радуйся, в скорбех и всяких злостраданиях всемощная наша Избавительнице.
    Радуйся, из мрака греховнаго на свет спасительныя жизни нас наставляющая.
    Радуйся, милосерднейшая Мати, на спасение нас наставляющая и от бед из избавляющая.

    Кондак 7

    Хотяй всем человеком спастися, Господь наш Иисус Христос дарова нам Тебе, Матерь Свою, да будеши в печалех утешение, в бедах скорая помощнице, в молитвах теплая предстательнице и к небесному веселию всех приводящая, верно вопиющих Сыну Твоему и Богу нашему. Аллилуиа.

    Икос 7

    Новую и спасительную жизнь дарова Христос Бог людям, призывая к покаянию и воздержанию, милосердию и самоотвержению и прочим евангельским добродетелям, содевающих нас воистину блаженными. Душе моя, погру¬женная во глубину суеты земной и пристрастия мирскаго и спящая непробудным сном греховным, почто не хощеши, яко же обещалася еси, совлещися ветхаго человека и облещися в новаго, почто грехами богатееши и волю диаволю твориши, в чесом надежду полагаеши, аще и весь мир приобрящеши, а себя погубиши, кая ти польза? Престани от сих и с плачем обратися к Божией Матери, есть бо скорая Помощнице кающимся, и с подобными тебе грешниками возопи: Молим Тя, недостойнии, единую благословенную в женах, избави нас, Пречистая, от страстей греховных благодатию Сына Твоего, прочее время живота нашего укрепи в заповедех Его ходити, непрестанно спасая в мире души наша да зовем Ти:
    Радуйся, венче воздержания.
    Радуйся, всесовершенный образе чистоты и непорочности.
    Радуйся, глубино милосердия и всех христианских добродетелей.
    Радуйся, и нам встати от сна греховнаго и ходити в законе Господни помогающая.
    Радуйся, милосерднейшая Мати, на спасение нас наставляющая и от бед избавляющая.

    Кондак 8

    Странно и непостижимо неверующим слышати о Боге, явльшемся во плоти, поношения, заушения и крестную смерть нас и нашего ради спасения претерпевшаго, странно сими и прочими тайнами веры православныя веровати. Мы же, не испытуя непостижимаго во смирении сердца, несумненно веруем всем тайнам домостроительства и спасения нашего, поя Богу: Аллилуиа.

    Икос 8

    Весь мир видимый и невидимый преисполнен чудесами Твоими, Богомати, и неизреченной милости к роду человеческому. Небо, земля и воздух, и вся яже в них, даде Христос Бог для блага нашего, К сим же дарова живоприимный источник — Тебе, Матерь Свою, пекущуюся о благе временной, пане же вечной жизни нашей — тако же не печется ни единая мать плотская . И воистинну неисповедимое море чудес вемы Тя, Богородице, яко Тобою возстают разслабленнии, недугующии исцеляются, слепии прозирают, от бесов томимые освобождаются. Темже благодарственно вопием Ти:
    Радуйся, милости Божией неистощимый источнике, всю вселенную напояющий.
    Радуйся, росою благодати Твоея телеса и души наша исцеляющая.
    Радуйся, от лютых бед и всякаго злаго обстояния нас избавляющая.
    Радуйся, вся благая для временной и вечной жизни нам дарующая.
    Радуйся, в путь спасительный шествовати нам помогающая.
    Радуйся, милосерднейшая Мати, на спасение нас наставляющая и от бед избавляющая.

    Кондак 9

    Всем бо нам подобает явиться пред судилищем Христовым, да примет кийждо, яже с телом содела или для блага, или для зла. Матерь Божия, како явлюся тамо? Како отвещу Бессмертному Царю или коим дерзновением воззрю на небеснаго Судию, блудный аз? О Мати милосердия, о Взыскание погибших, на спасение стези настави мя, Богородице, и в день Страшнаго Суда явися, Владычице, и предстания мя муки вечнаго и огня геенскаго свобождающи, да спасен Тобою, воспою Твою благодать и принесу благодарственно хвалебную песнь богу : Аллилуиа.

    Икос 9

    Ветии многовещанные, псалмопевцем же нарицаемии безумнии, рекут, несть Бога, несть души в человеке, несть загробной жизни, несть промысла Божия и прочии подобнии сим глаголы. Не памятуя Творца и Создателя Своего, дающаго нам день и нощь, пищу и питие, дыхание и жизнь, и всякое благобытие, ибо о сем все мы живем и движемся — увы, вол знает ясли хозяина своего и осел знает ясли стяжавшаго его. Разумная же тварь, уловляемая диаволом душегубцем в сети неверия, не позна Господа Бoгa своего и уповающе токмо на разум свой. Мы же не надеемся ни на князи человеческия, ни на сыны их, но же упование возлагаем на Твоего Сына, Богородице, и веруем непреложно, яко Той есть Спаситель наш. Ты же, Мати Божия, помози нам светильник веры нашей донести до конца неугасимым, да в умилении вопием Ти:
    Радуйся, исправление нераскаянных грешников.
    Радуйся, матерними молитвами грехи наши прощающая.
    Радуйся, веры православныя охранение.
    Радуйся, неверия, ересей ирасколов искоренение.
    Радуйся, в православной вере и жизни по ней наше утверждение.
    Радуйся, от прелести и самообольщения наше сохранение.
    Радуйся, милосерднейшая Мати, на спасение нас наставляющая и от бед избавляющая.

    Кондак 10

    Спасти хотяй нас грешных, многое множество яви нам Господь чудотворных икон Пречистыя Матери Своея, из них же едина Взыскание погибших именуемая, яко луна пресветлая, нас озаряет и вся благая нам дарует, пред нею же поклоняюще вопием: Аллилуиа.

    Икос 10

    Стена еси нерушимая, просвещение, избавление и помощница наша всерадостная Ты еси Пречистая Дева, души и телеса наша сохрани под кровом Твоим, Преблагословенная Богородице, и от различных надлежащих на нас бед и скорбей избави, дя не порадуется враг о погибели нашей, но да славим Тя во веки, воспевая тако:
    Радуйся, Хранительнице наша в пути.
    Радуйся, единая Надеждо спасения.нашего.
    Радуйся , покрове и защищение наше от враг видимых и невидимых.
    Радуйся, крепость наша и якорь спасения в буре бед и скорбей.
    Радуйся, грешников взыскание и к истинному покаянию приведение.
    Радуйся, милосерднейшая Мати, на спасение нас наставляющая и от бед избавляющая.

    Кондак 11

    Пение всеумиленное приносим Ти, Богородице, яко всемилостивой нашей заступнице пред Богом и Взысканию погибших, и Тебе единую в женах благословенную молим избави нас, Пречистая, от страстей греховных благодатию Сына Твоею и укрепи нас прочее время жизни нашея ходити по заповедем Его и пети: Аллилуиа.

    Икос 11

    Светоподательную свещу зрим Тя, Богородице, среди мрака греха, развращения, уныния, отчаяния и лютых бед и скорбей. Оружие бо преходит душу Твою, яко же Тебе предрече праведный старец Симеон, о коль многих из нас, зряще чад и ближних наших, во гресех неверия и иных гресех погибающих. В печалехнаших буди нам, о Мати Милосердия, сладкое утешение, в бедах скорая помощнице, в молитвах предстательница и непреложное упование, потщися, Пречистая, печаль нашу на радость преложити, да в умилении зовем Ти:
    Радуйся, обуреваемых тихое пристанище.
    Радуйся, печаль нашу на радость претворяющая.
    Радуйся, несумненною надеждою нас веселящая.
    Радуйся, душевныя и телесныя раны наша милостивно врачующая.
    Радуйся, вся яже к жизни и благочестию нам дарующая.
    Радуйся, милосерднейшая Мати, на спасение нас наставляющая и от бед избавляющая.

    Кондак 12

    Благодать истиннаго покаяния и богоугоднаго жития испроси нам у Сына Твоего и Бога нашего, яко Ты еси Пречистая сущим в бедах прибежище, немощным помогаеши, грешных исправляеши и ко спасению наставляеши и пети Богу научаеши: Аллилуиа.

    Икос 12

    Поюще Твое неизреченное милосердие ко взысканию погибающих грешников, недоумеваем благохвалити Тя, Богородице, по достоянию, обаче уповаем на Твою материнскую любовь к нам, недостойным, и дерзаем просити Тя: преклонися к мольбам рабов Твоих, Владычице, и не закосни избавити нас от скорбей и бед, яже обдержат нас, видимых и невидимых врагов отжени от нас, на путь покаяния и спасения настави и Царствия Небеснаго наследниками быти сотвори, да с благодарением зовем Ти:
    Радуйся, упование наше в жизни и по смерти.
    Радуйся, единая Ходатаица благ временных и вечных.
    Радуйся, смиренных возвышающая.
    Радуйся, вся потребная ко спасению нашему ниспосылающая.
    Радуйся, от наветов плоти, мира и диавола нас охраняющая.
    Радуйся, уповающим на Тя мирную кончину и вечную радость дарующая,
    Радуйся, неложная Попечительнице несчастных во узах и темницах, в плену и оковах душевно и телесно страждущих.
    Радуйся, милосерднейшая Мати, на спасение нас наставляющая и от бед избавляющая.

    Кондак 13

    О Всепетая Мати, Взыскание погибших именуемая! Ты в напастях и скорбех милостивно защищаеши иже под кров Твой прибегают. Приими, Пречистая, и наше от всего сердца приносимое Тебе моление, да не во зле отчаяния погибнем, но да спасении присно Тобою Богу вопием: Аллилуиа.

    Этот кондак читается трижды, затем повторяются икос 1 и кондак 1

    Молитва 1

    О, Богоизбранная Заступница грешных, взыскание погибших и Наставнице заблудших! Ты не презираешь удалившейся своеволием от пажити Сына Твоего блуждающей в дебрях греха бедной словесной овцы, но шед, ищешь заблудшую. Кто исследит пути милосердия Твоего? Будь милостива ко всем: погибающих извлеки из бездны погибели, заблудших обрящи и настави, удаленных обрати и привлеки, обращающихся к Тебе и приближающихся приими и спаси. Всех же кающихся к Сыну Твоему, Доброму Пастырю, и Богу нашему приведи, да молитвами Твоими не будет ни единыя овцы без вести пропавшия, но да будет едино стадо и един Пастырь, иже упасет души наша и открыет ходатайством Твоим двери во обители вечныя. Аминь.

    Молитва 2

    О, Пресвятая Владычице Богородице, взыскание погибших! Призри милостивым Твоим оком на молящихся пред честною Иконою Твоею. Воздвигни нас из глубины греховныя: просвети ум наш, омраченный страстьми, уврачуй язвы душ и телес наших. Ты веси непрестающия скорби и вся немощи наша: подай нам руку помощи, облегчи страдания. Буди нам милосердия и мира источник, утешение в бедах и крепкое прибежище грешником кающимся. Даруй нам исправление греховныя жизни нашея: заблудших на путь правый настави, падших и погибающих силою благодати спаси. От внезапныя смерти избави, с Сыном Твоим и судиею праведным нас примири и вечныя муки свободи. Милосердным же предстательством Твоим сподоби нас вселитися в во обителех небесных, идеже непрестанный глас празднующих радостно славит Пресвятую Троицу, Отца и Сына и Святаго Духа, ныне и присно и во веки веков. Аминь.

    тропарь

    Глас 7

    Радуйся, Благодатная Богородице Дево,/ во объятиях Своих Предвечнаго Младенца и Бога носившая./ Проси Его дати миру умирение/ и душам нашим спасение./ Сын бо Тебе, Богомати, вещает,/ яко вся прошения Твоя во благое исполнит./ Сего ради и мы припадающе, молим Тя/ и надеющийся на Тя, да не погибнем,/ имя Твое именуем:/ Ты бо еси, Владычице,/ Взыскание погибших.

    тропарь

    Глас 4

    Взыщи нас, погибающих, Пресвятая Дево, не по грехом бо нашим наказуеши нас, но по человеколюбию милуеши: избави нас от ада, болезни и нужды и спаси нас.

    молитва
    Заступнице усердная, Благоутробная Господа Мати, к Тебе прибегаю аз, окаянный и паче всех человек грешнейший, вонми гласу моления моего, вопль мой и стенания усльппи, яко беззакония моя превзыдоша главу мою, и аз, якоже корабль в пучине, погружаюся в море грехов моих. Но Ты, Всеблагая и Милосердая Владычице, не презри мене, отчаяннаго и во гресех погибающего; помилуй мя, кающагося в злых делех моих, и обрати на путь правый заблуждшую окаянную душу мою. На Тебе, Владычице моя Богородице, возлагаю все упование мое. Ты, Мати Божия, сохрани и соблюди мя под кровом Твоим, ныне, и присно, и во веки веков. Аминь.
    молитва
    О, Пресвятая и Преблагословенная Дево, Владычице Богородице! Призри милостивым Твоим оком на нас, предстоящих пред святою иконою Твоею и со умилением молящихся Тебе, воздвигни нас из глубины греховный, просвети ум наш, омраченный страстьмй, и уврачуй язвы душ и телес наших. Не имамы иныя помощи, не имамы иныя надежды, разве Тебе, Владычице, Ты веси вся немощи и согрешения наша, к Тебе прибегаем и вопием: не остави нас Твоею Небесною помощию, но предстани нам присно и Твоим неизреченным милосердием и щедротами спаси и помилуй нас, погибающих. Даруй нам исправление греховныя жизни нашея и избави нас от скорбей, бед и болезней, от напрасныя смерти, ада и вечныя муки. Ты бо, Царице и Владычице, скорая Помощница и Заступница всем, притекающим к Тебе, и крепкое прибежище грешников кающихся. Подаждь убо нам, Преблагая и Всенепорочная Дево, христианский конец живота нашего, мирен и непостыден, и сподоби нас Твоим ходатайством вселитися в обителях Небесных, идеже непрестанный глас празднующих радостию славит Пресвятую Троицу, Отца, и Сына, и Святаго Духа, ныне, и присно, и во веки веков. Аминь.
    молитва

    О, Богоизбранная Заступница грешных, взыскание погибших и Наставнице заблудших! Ты не презираешь удалившейся своеволием от пажити Сына Твоего блуждающей в дебрях греха бедной словесной овцы, но шед, ищешь заблудшую. Кто исследит пути милосердия Твоего? Будь милостива ко всем: погибающих извлеки из бездны погибели, заблудших обрящи и настави, удаленных обрати и привлеки, обращающихся к Тебе и приближающихся приими и спаси. Всех же кающихся к Сыну Твоему, Доброму Пастырю, и Богу нашему приведи, да молитвами Твоими не будет ни единыя овцы без вести пропавшия, но да будет едино стадо и един Пастырь, иже упасет души наша и открыет ходатайством Твоим двери во обители вечныя. Аминь.

    молитва

    О, Пресвятая Владычице Богородице, взыскание погибших! Призри милостивым Твоим оком на молящихся пред честною Иконою Твоею. Воздвигни нас из глубины греховныя: просвети ум наш, омраченный страстьми, уврачуй язвы душ и телес наших. Ты веси непрестающия скорби и вся немощи наша: подай нам руку помощи, облегчи страдания. Буди нам милосердия и мира источник, утешение в бедах и крепкое прибежище грешником кающимся. Даруй нам исправление греховныя жизни нашея: заблудших на путь правый настави, падших и погибающих силою благодати спаси. От внезапныя смерти избави, с Сыном Твоим и судиею праведным нас примири и вечныя муки свободи. Милосердным же предстательством Твоим сподоби нас вселитися в во обителех небесных, идеже непрестанный глас празднующих радостно славит Пресвятую Троицу, Отца и Сына и Святаго Духа, ныне и присно и во веки веков. Аминь.

    22
    Птн
    2017